Azərbaycan Respublikası Səhiyyə Naziri Oqtay Şirəliyevin 17.05.2016-cı il tarixli 34 saylı "Respublikanın regionlarında uşaq psixi sağlamlıq xidmətinin təkmilləşdirilməsi haqqında əmrinə əsasən Azərbaycan Respublikası regionlarında uşaq poliklinikalarının nəzdində psixi sağlamlıq bölmələri yaradılmışdır. Bu istiqamətdə görülən tədbirlər çərçivəsində Psixi Sağlamlıq Mərkəzində regionlarda psixoloji xidmətin təşkilinə dair treninq təşkil edilmişdir. Treninqdə bölgələrdə-Sumqayıt, Gəncə, Mingəçevir, Şəki, Quba,  Lənkəran, Şirvan şəhərlərində fəaliyyət göstərən psixoloqlar, psixiatrlar, loqopedlər iştirak etmişdir. Mərkəzimizin həkim və psixoloqları psixoloji xidmətin təşkili, həmçinin psixi xəstəliklər və onların müasir müalicə üsulları, reabilitasiya proqramları haqqında təqdimatlarla çıxış etmişdirlər. Treninq zamanı autizm spektrli pozuntusu olan uşaqlara psixososial müdaxilələr, multidisiplinar komanda fəaliyyətinin təşkili, autizmli uşaqların ailələrilə iş prinsipləri, uşaq və yeniyetmələrdə nitq və davranış vərdişləri və s. interaktiv şəkildə müzakirə edilmişdir.